Abarimo Umugaba Mukuru w’Ingabo za Iran baguye mu gitero kidasazwe cyagabwe na  Israel

Mu rukerera rwo kuri uyu wa 13 Kamena 2025, Israel yagabye igitero gikomeye ku butaka bwa Iran cyiswe ‘Operation Rising Lion’ cyifashishije indege z’intambara zirenga 200 n’izitagira abapilote (drones) zirenga 100.

Iki gitero cyagabwe ku bikorwaremezo bitunganyirizwamo ingufu za nucléaire mu duce turimo Natanz, ahakorerwa n’ahabikwa misile, ahakorera abayobozi b’igisirikare, ku bigo by’umutwe w’ingabo zidasanzwe (Revolutionary Guard) no ku ngo z’abahanga mu bya nucléaire.

Igisirikare cya Israel (IDF) cyatangaje ko ahantu hafi 100 ari ho hagabweho iki gitero, kandi ko cyishe Umugaba Mukuru w’Ingabo za Iran, Gen. Major Mohammad Bagheri, Umuyobozi wa Revolutionary Guard, Hossein Salami n’Umuyobozi w’Umutwe w’Ingabo zishinzwe ibikorwa byihutirwa.

IDF yagize iti “Ubu twakwemeza ko Umugaba Mukuru w’ingabo za Iran, umuyobozi wa IRGC n’umuyobozi w’umutwe w’ingabo ushinzwe ibikorwa byihutirwa bose biciwe mu bitero Israel yagabye hirya no hino muri Iran, yifashishije indege z’intambara zirenga 200.”

Igisirikare cya Israel kandi cyishe abahanga mu bya nucléaire bagiraga uruhare rukomeye mu gutunganya izi ngufu barimo Fereydoun Abbasi-Davani na Mohammad Mehdi Tehranchi.

Minisitiri w’Intebe wa Israel, Benjamin Netanyahu, yasobanuye ko iki gitero kigamije guhagarika umugambi wa Iran wo gukora intwaro kirimbuzi, kandi ko “bizakomeza iminsi myinshi kugeza bikuyeho ibyabangamira kubaho kwa Israel.”

Iki gitero kigabwe mu gihe Iran na Leta Zunze Ubumwe za Amerika biri mu biganiro bigamije kugera ku masezerano yo guhagarika gukora intwaro kirimbuzi, ibyatuma Iran ikurirwaho ibihano by’ubukungu yafatiwe.

Ni nyuma y’aho inama y’ubutegetsi y’urwego rw’Umuryango w’Abibumbye rushinzwe kugenzura ikoreshwa ry’ingufu za nucléaire, ku wa 12 Kamena 2025 yemeje ku nshuro ya mbere mu myaka hafi 20 ko Iran yarenze ku mabwiriza yo kuruha amakuru yose ajyanye n’uburyo itunganya izi ngufu.

Minisitiri w’Ububanyi n’Amahanga wa Amerika, Marco Rubio, yatangaje ko nta ruhare igihugu cye cyagize muri iki gitero, asaba Iran kudahungabanya ibikorwa by’igihugu cyabo cyangwa se abenegihugu ba Amerika.

Hari amakuru avuga ko nubwo Amerika itagize uruhare muri iki gitero, Israel yabanje kuyimenyesha ko igiye kurasa muri Iran.