Amateka yanditswe i Bujumbura: Umugore wa mbere agizwe Minisitiri w’Ingabo!

Perezida w’u Burundi, Evariste Ndayishimiye, yakoze impinduka zikomeye muri Guverinoma, aho bamwe mu bayigize basimbuwe abandi baragaruka. Muri izo mpinduka, icyatangaje benshi ni ugushyiraho Madamu Marie-Chantal Nijimbere ku mwanya wa Minisitiri w’Ingabo , aba umugore wa mbere mu mateka y’u Burundi wicaye muri uwo mwanya ukomeye mu rwego rw’umutekano w’igihugu.

Marie-Chantal Nijimbere nta mateka azwi y’akazi mu bijyanye n'igisirikare , yabaye Minisitiri w’Ubucuruzi, Ubwikorezi n’Ubukerarugendo kuva 2020 kugeza 2024, Mbere yaho yari Minisitiri w’Itumanaho, Ikoranabuhanga n’Itangazamakuru.

Madame Marie-Chantal Yisanze muri Guverinoma nshya hamwe n'abandi ba Minisitiri babiri aribo François Havyarimana na Lyduine Baradahana akaba aribo bonyine bahoze muri Guverinoma bongeye kugirirwa icyizere na Perezida Ndayishimiye.

Iri tegeko ryashyizweho na Perezida ryafashwe nk’intambwe idasanzwe mu guteza imbere uburinganire mu nzego z’ubuyobozi, ndetse rikaba ryaragaragaje ubushake bwa Leta y’u Burundi bwo guha abagore ijambo mu byemezo bikomeye bireba umutekano n’iterambere ry’igihugu.