Uganda: Uko urupfu rw’ umusore w’umuherwe wagaragazaga impuhwe, rwashenguye igihugu cyose

Abanya-Uganda baracyari mu gahinda gakomeye nyuma y’urupfu rutunguranye rwa Rajiv Ruparelia, umuhungu w’umuherwe w’icyamamare Sudhir Ruparelia, akaba yari n’Umuyobozi Mukuru wa Ruparelia Group. Yapfiriye mu mpanuka y’imodoka yabereye mu gace ka Busabala Flyover, Makindye-Ssabagabo, ku mugoroba wo ku wa Gatandatu.

Nk’uko Polisi ya Uganda yabitangaje, Rajiv wari utwaye imodoka ya Nissan GTR avuye Kajjansi yerekeza Munyonyo, yagonze ibyuma by’inkuta ziri kubakwa umuhanda, imodoka irahirima ihita ifatwa n’inkongi. Yitabye Imana aho nyine, afite imyaka 35.

Rajiv yari umwe mu bashoramari bato batinyutse isoko ry’ishoramari ryo mu rwego rwo hejuru, ashyira imbere ikoranabuhanga, uburezi n’imishinga y’abato. Ruparelia Group ye yashoraga akayabo mu mishinga itandukanye kandi yatangaga akazi ku bihumbi by’urubyiruko.

Ubutumwa bw’akababaro bwinshi bwakomeje kugera ku mbuga nkoranyambaga, harimo ubw’Umuyobozi w’Inteko Ishinga Amategeko, Anita Annet Among, ndetse na Bobi Wine, wamushimiye kuba yarabaye umuntu wicisha bugufi, wuje urukundo n’impuhwe zidasanzwe.

Rajiv azashyingurwa ku wa Gatatu hakoreshejwe uburyo bwo gutwika umurambo, nk’uko bisanzwe bikorwa mu muco w’Abahindu, ari nawo muryango akomokamo.

Urupfu rwe rwagize ingaruka zikomeye ku buzima bw’igihugu n’urubyiruko rwasaga nk’urwifashisha urugero rwe nk’umushoramari w’indashyikirwa.