Jules Karangwa ugiye kuyobora Rwanda Premier League nu muntu ki?

Jules Karangwa, wahoze ari Umujyanama mu by’Amategeko mu Ishyirahamwe ry’Umupira w’Amaguru mu Rwanda (FERWAFA), yatangajwe nk’Umuyobozi Mukuru (CEO) w’Urwego rushinzwe gutegura Shampiyona y’Icyiciro cya Mbere, Rwanda Premier League.

Ni inkuru yamenyekanye kuri uyu wa Gatatu tariki ya 06 Kanama 2025, aho byatangajwe ko agiye gusimbura by’agateganyo ubuyobozi bwa RPL, mu gihe shampiyona y’umwaka wa 2025–2026 yegereje.

Jules Karangwa azwi cyane mu ruhando rw’imiyoborere y’imikino, by’umwihariko mu bijyanye n’amategeko agenga ruhago. Afite impamyabumenyi mu mategeko (Law), ndetse yihugura mu mategeko y’imikino (Sports Law) n’imicungire y’imishinga ya siporo.

Umujyanama mu by’amategeko muri FERWAFA, aho yagize uruhare mu igenzura ry’amasezerano y’abakinnyi n’amakipe, ndetse akanahagararira u Rwanda mu manza zishingiye ku mupira w’amaguru.

Yitabiriye inama zitandukanye za CAF na FIFA, anagira uruhare mu gushimangira ubunyamwuga bwa ruhago y’u Rwanda ku rwego mpuzamahanga. Azwiho kuba umuntu wizewe, w’umunyamurava kandi uharanira imikorere iboneye n’ubunyangamugayo.

Nk’Umuyobozi Mukuru wa Rwanda Premier League Ltd, Jules Karangwa azaba ashinzwe:Gucunga neza ishyirwa mu bikorwa rya shampiyona y’icyiciro cya mbere, Gukorana n’amakipe, abaterankunga, n’abafatanyabikorwa batandukanye, Gukomeza kongera ubushobozi bw’amarushanwa, haba mu mikino no mu buryo bwa tekinike n’imari, Guteza imbere urwego rwo kumenyekanisha shampiyona mu gihugu no hanze. 

Gushyira Jules Karangwa kuri uyu mwanya ni icyemezo gishingiye ku bushobozi, ubunararibonye, n’ubumenyi afite mu miyoborere ya siporo. Abakurikiranira hafi ruhago bemeza ko ari intambwe ikomeye mu rugendo rwo kongerera agaciro shampiyona y’u Rwanda.