Ibyamamare 2 by’isi mu mupira w’amaguru byageze mu Rwanda

Ibyamamare bibiri by’isi mu mupira w’amaguru, Jay-Jay Okocha na Didier Domi, bageze mu Rwanda kuri iki Cyumweru tariki ya 6 Nyakanga 2025, mu rugendoshuri rw’iminsi itanu ruri muri gahunda ya Visit Rwanda, ubukangurambaga bw’ubukerarugendo bukorwa ku bufatanye na Paris Saint-Germain (PSG), ikipe ikomeye mu Bufaransa.

Didier Domi ni we wageze i Kigali mbere ku manywa, mu gihe Jay-Jay Okocha yageze mu gihugu nimugoroba. Uru ruzinduko rwabo ruzageza ku ya 11 Nyakanga, rukaba ari igice cy’ubufatanye bwatangiye mu 2019 hagati ya PSG na Visit Rwanda, buherutse kongerwa muri Mata 2025 kugira ngo buzageze mu 2028.

Ubu bufatanye bugamije guteza imbere u Rwanda nk’ahantu nyafurika ho gusura, gushoramo imari ndetse no guteza imbere urubyiruko.

Jay-Jay Okocha, wahoze akinira ikipe y’igihugu ya Nigeria, yavuze ati: “Turi hano ngo twerekane ubufatanye buri hagati ya PSG na Visit Rwanda, kandi natwe ubwacu twerekane ubwiza bw’iki gihugu cy’u Rwanda.”

Jay-Jay Okocha yakiniye PSG hagati ya 1998 na 2002, aho yagaragaje ubuhanga bwihariye mu mupira w’amaguru, bikamuhesha igikundiro mu bafana ndetse agatera ishyaka bagenzi be barimo na Ronaldinho, waje kuba umwe mu bakinnyi b’ibyamamare ku isi.

Didier Domi, waturutse mu ishuri ry’abatoza rya PSG, na we yagize uruhare rukomeye mu bihe by’intsinzi by’iyo kipe, barimo gutwara Coupe de la Ligue mu 1995 na UEFA Cup Winners’ Cup mu 1996.

Muri uru rugendo, bazasura ahantu nyaburanga h’ingenzi mu Rwanda, harimo Pariki y’Igihugu y’Ibirunga, izwi cyane ku isi hose kubera ingagi zo mu misozi.

Uruzinduko rwabo ni igice cy’ingamba za guverinoma y’u Rwanda zo guhuriza hamwe diplomasi y’imikino n’iterambere ry’ubukerarugendo, nk’uko byagaragaye no mu ruzinduko rwa ba rutahizamu ba PSG barimo Pedro Miguel Pauleta, Sergio Ramos, Keylor Navas, na Julian Draxler, bose basuye u Rwanda mu bihe bitandukanye.

Mu gihe u Rwanda rukomeza kugaragara nk’igihugu kiyemeje guhuza uburanga karemano n’ubuhanga mu mupira w’amaguru, kugera mu Rwanda kwa Okocha na Domi ni ubutumwa bukomeye ku isi.

Nsengimana Donaten |Ijambo.net