Angell Mutoni agiye kwitabira iserukiramuco rya Hip Hop Asili muri Tanzania

Umuraperikazi, umusizi ndetse akaba n’umwanditsi w’indirimbo, Angell Mutoni, agiye kwitabira iserukiramuco rya Hip Hop Asili muri Tanzania, aho azaba ari we muhanzi mukuru.

Iri serukiramuco rya Hip Hop Asili risanzwe riba buri mwaka, kuri iyi nshuro biteganyijwe ko rizaba ku matariki ya 27 na 28 Kamena 2025, rikabera ku kigo cy'ishuri rya TASUBA College of Arts riherereye i Bagamoyo, muri Tanzania.

Angell Azafatanya na Wakazi, umuraperi w’umunya-Tanzania uzwiho gukoresha indimi ebyiri (Icyongereza n’Igiswahili) mu ndirimbo ze, ndetse no kugira imyandikire yihariye igera ku mutima kuko akunze kuvuga ku buzima bwe n’amasomo yabwigiyemo.

Iri serukiramuco rizamara iminsi ibiri, rizaba ririmo ibitaramo bya muzika, amahugurwa no kwerekana imico itandukanye, byose bigamije kugaragaza hip hop nk’igikoresho cyo kwigisha no guhuza imico itandukanye.

Rikazahuriza hamwe abahanzi, abatunganya umuziki n’abakunzi b'injyana ya hip hop baturutse bice bitandukanye mu Karere ndetse n’ahandi ku Isi.

Iserukiramuco rya Hip Hop Asili rikomeje kugira agace ka Bagamoyo nk'ihuriro ry’ubuhanzi muri Afurika y’Iburasirazuba, ndetse no gahuza abakunzi b'injyana ya hip hop mu mpande z'Isi.