Abanyeshuri biga muri gahunda Nzamurabushobozi basabwe gukoresha neza amahirwe bahawe

Ku wa Mbere, tariki ya 4 Kanama 2025 , Umunyamabanga wa Leta muri Minisiteri y’Uburezi ushinzwe amashuri y’inshuke, abanza n’ayisumbuye, Madamu Irere Claudette, yasuye abanyeshuri bari kwiga muri gahunda Nzamurabushobozi, igamije gufasha abana batsinzwe ibizamini mu byiciro barimo kugira ngo badasibira.

Iyi gahunda yateguwe na MINEDUC ifasha abanyeshuri kubona amahirwe ya kabiri yo gukosora aho bagize intege nke, binyuze mu masomo yihariye n’ubujyanama.                                                          Madamu Irere yasuye ikigo GS Kimironko aho yahuriye n’abana bari mu masomo, abashishikariza gukoresha neza aya mahirwe bahawe, bakongera imbaraga mu myigire yabo kugira ngo bazabone intsinzi mu bizamini bategurirwa.

Ati“Aya ni amahirwe adahabwa buri wese. Mujye mushyiramo umwete, mubaze aho mutumva neza, kandi mwihe intego yo gutsinda,”

Yavuze ko Leta y’u Rwanda yita ku burezi bw’umwana wese, ndetse ko izi gahunda zigamije kudatakaza umunyeshuri n’umwe ushobora kuzamuka aramutse ahawe ubufasha.

Abarezi ndetse n’abayobozi b’ishuri bashimye iyi gahunda ndetse banagaragaza ko abanyeshuri bari kwitwara neza mu masomo, bafashwa n’abarimu b’inzobere mu masomo atandukanye.

Gahunda Nzamurabushobozi ikomeje gushyirwa mu bikorwa ku rwego rw’igihugu, aho abanyeshuri batsinzwe mu bizamini bya leta bahabwa amahugurwa n’amasomo yo kubafasha kongera amahirwe yo gutsinda.