Tunisia ntiyayivamo burundu – Nshuti Innocent yasinye amasezerano mashya

Rutahizamu w’Ikipe y’Igihugu Amavubi, Nshuti Innocent, yongeye kwerekeza muri shampiyona ya Tunisia nyuma y’imyaka irindwi, yerekanywe nk’umukinnyi mushya wa ES Zarzis, ikipe ikina mu cyiciro cya mbere.

Ni kuri uyu wa Gatanu, tariki ya 25 Nyakanga 2025, ubwo yasinyaga amasezerano y’imyaka ibiri, nyuma yo gutandukana na Sabail FK yo muri Azerbaijan.

Si ubwa mbere Nshuti akandagiye muri shampiyona ya Tunisia, kuko mu 2018 yakiniye Stade Tunisien. Kugaruka kwe muri icyo gihugu ni nk’uwagarutse aho yari asanzwe azwi, kandi bikaba bishobora kumufasha kwitwara neza kuko ahazi neza.

ES Zarzis, ikipe yasinyiyemo, yasoje umwaka ushize iri ku mwanya wa gatanu mu makipe ya shampiyona ya Tunisia. Iyi kipe irimo kongera imbaraga mu busatirizi bwayo, ikaba yizeye ko uyu Munyarwanda azayifasha kuzamura urwego mu mwaka w’imikino utaha.

Biteganyijwe ko Nshuti Innocent azakina umukino we wa mbere ku wa 9 Kanama 2025, ubwo ES Zarzis izahura na CS Sfaxien, imwe mu makipe akunzwe kandi afite amateka.

Uretse kuba agiye kwigaragaza muri shampiyona ikomeye, Nshuti anitezweho byinshi n’Abanyarwanda, cyane cyane nk’umukinnyi usanzwe ari mu rutonde rw’abahabwa icyizere n’umutoza Carlos Alós Ferrer w’Amavubi.

Igaruka rye muri Tunisia rishimangira ko atari igihugu cyamuvuyemo burundu – ahubwo ni isoko y’amahirwe mashya, aho azashaka kongera kwiyubaka no gufasha ikipe y’igihugu mu gihe azaba abona iminota myinshi yo gukina ku rwego rwo hejuru.