RDC: Inyeshyamba za M23 zigaruriye Luke na Katobotobo nyuma y’iminsi 3 hasinywe amasezerano y’amahoro 

Nyuma y’iminsi itatu gusa hasinywe amasezerano  y’amahoro hagati y'ihuriro AFC/M23 hamwe na Leta ya Kinshasa  yo guhagarika imirwano,  kuri uyu wa Kabiri tariki ya 21 Nyakanga 2025,  imirwano yongeye kubura hagati y’inyeshyamba za M23 ndetse n'abarwanyi  ba Wazalendo, muri Teritwari ya  Masisi, mu Ntara ya Kivu y’Amajyaruguru.

Amakuru atangwa n’abaturage ndetse n’inzego z’umutekano yemeza ko inyeshyamba za M23 zafashe imidugudu ya Luke na Katobotobo, biherereye mu gace ka Nyamaboko 1 . Abaturage bavuga ko bumvise amasasu n’urusaku rw’imbunda kuva saa kumi n’imwe z’igitondo, ibintu byateye ubwoba bwinshi mu duce dutandukanye two hafi aho.

Umwe mu bayobozi b’inzego z’ibanze wo muri Nyamaboko yagize ati:"Ni agahomamunwa kubona abasinye amasezerano y’amahoro bakomeza ibikorwa by’intambara. Ni ukwica amasezerano  no gukomeretsa abaturage."

Abasesenguzi b’akarere bavuga ko ibi bitero ari ukunyuranya n’ibyemeranyijwe n’impande zose zashyize umukono ku masezerano y’amahoro, aho byari biteganyijwe ko imirwano ihagarara burundu kandi hakitabwa ku biganiro.

Kugeza ubu, haracyari urujijo ku buryo ibihugu byari byagize uruhare muri aya masezerano bizabyitwaramo, cyane cyane ku bijyanye no gukurikirana iyubahirizwa ry’ibyo byemejwe i Doha.

Mu gihe impande z’intambara zitarahagarika imirwano, abaturage bakomeje guhunga,  Abasivile nibo bakomeje guhura n’ingaruka zikomeye z’aya makimbirane, harimo ubwicanyi, ihohoterwa no  gutakaza ibyabo.