Senegal yanyagiye ikipe y'igihugu y'Ubwongereza imbere y'abakunzi bayo

Ku wa Kabiri tariki 10 Kamena 2025, hakomezaga imikino ya gishuti ku mubagane w'i Burayi ndetse hanakinwa imikino yo gushaka itike yo kuzakina igikombe cy'Isi cya 2026.

Ni imikino yari iryoshye ku bayikurikiye ariko inkuru yaraye i Burayi n'ukunyagirwa ku ikipe y'igihugu y'ubwongereza ndetse na Memphis Depay wuzuzaga ibitego 50 mu ikipe y'igihugu y'Ubuhorandi.

Ikipe y'igihugu y'Ubwongereza yatsinzwe na Senegal ibitego 3-1 ariko ibikora ivuye inyuma kuko rutahizamu Harry Kane yari yabanje gutsindira Ubwongereza igitego cya mbere ku munota wa 7.

Ikipe y'igihugu ya Senegal ku munota wa 40, Ismaïla Sarr, yaje kwishyura iki gitego cyatsinzwe n'Ubwongereza. Mouhamadou Habib Diarra ku munota wa 62 yatsinze igitego cya Kabiri ndetse no ku munota wa 93, Cheikh Tidiane Sabaly atsinda icya 3.

Uyu mukino wahuje ikipe y'igihugu ya Senegal n'Ubwongereza wari uwa gishuti wabereye mu gihugu cy'Ubwongereza kuri sitade ya Nottingham Forest, City Ground.

Nubwo hakinwaga uyu mukino wa gishuti, ariko mu gihugu cy'Ubuhorandi hakinwaga umukino wo gushaka itike yo gukina igikombe cy'Isi kizaba 2026.

Ubuhorandi bwakinaga na Malta, butsinda ibitego 8-0. Muri uyu mukino Memphis Depay yatsinzemo ibitego 2 ku munota wa 9 na 16. Virgil van Dijk yatsinze igitego ku munota wa 20, Xavi Simon ku munota wa 61, Malen ku munota wa 71 na 80, Lang ku munota wa 78 ndetse na Van de Ven ku munota wa 92.

Muri Amerika y'epfo, naho hakinwe imikino yo gushaka itike y'igikombe cy'Isi yabaye mu rukerera rwo kuri uyu wa Gatatu. Ni imikino 2 harimo uwahuje ikipe y'igihugu ya Argentina na Colombia urangira ikipe zombi zinganyije igitego 1-1. Ikipe y'igihugu ya Argentina yatsindiwe na Thiago Almada naho Colombia itsindirwa na Luis Diaz.

Uyu mukino rutahizamu Lionel Messi yabanje mu kibuga nkuko byari byatangajwe mbere na Lionel Scaloni utoza ikipe y'igihugu ya Argentina.

Ikipe y'igihugu ya Brazil yakinaga na Paraguay, umukino urangira ikipe ya Brazil itsinze igitego 1-0. Ni igitego cyatsinzwe na Vinicius Jr ku mupira yahawe ba Matheus Cunha.

Ikipe y'igihugu ya Brazil yahise ibona itike yo gukina igikombe cy'Isi kizabera muri Leta zunze ubumwe z'Amerika 2026. Ni ibintu bibabaye ku mukino wa Kabiri Carlos Ancelotti atoje iyi kipe.