SADC yamaganye ibirego by’akarengane ku Ngabo zayo muri DRC

Umuryango w’Iterambere ry’Ibihugu bya Afurika y’Amajyepfo (SADC) wamaganije wivuye inyuma ibirego bivuga ko wasize ingabo zawo ziri mu butumwa bwo kugarura amahoro mu burasirazuba bwa Repubulika ya Demokarasi ya Congo (DRC), aho bivugwa ko bahanganye n’ibibazo birimo kubura imodoka zibacyura, kudahabwa imishahara ndetse no kurya rimwe ku munsi.

Mu itangazo ryashyizwe ahagaragara ku wa Kabiri, tariki ya 20 Gicurasi 2025, binyuze ku rubuga rwawo no ku mbuga nkoranyambaga z’Igisirikare cya Afurika y’Epfo (SANDF), SADC yateye utwatsi ibivugwa mu binyamakuru bibiri byo muri Afurika y’Epfo, byashinjaga umuryango kwirengagiza ingabo zawo ziri i Goma no kutazishakira imodoka zo kuzisubiza muri Tanzaniya.

SADC yagize iti: "Ibi birego nta shingiro bifite, birayobya kandi ntibihuye n’ukuri. Gahunda yo kohereza no gusubiza ingabo igenda ikurikizwa uko yemejwe n’impande zose bireba."

Uyu muryango wemeza ko ibikorwa byose byo kuvana ingabo muri Congo biri kugenzurwa na Maj. Gen. Monwabisi Dyakopu wo muri Afurika y’Epfo, uyoboye ingabo za SAMIDRC, kandi bigakorwa hubahirijwe amabwiriza ya SADC n’amahame mpuzamahanga y’umutekano.

Iri tangazo rije nyuma y’uko havugwaga ibibazo bikomeye byagaragajwe n’abasirikare bari muri Congo n’imitwe ya politiki itandukanye yo muri Afurika y’Epfo. Umuryango uharanira uburenganzira bw’abasirikare, Sandu (SA National Defence Union), wavuze ko wahawe ibirego byinshi by’abasirikare bavugaga ko batabona imishahara n’ibyo kurya.

Pikkie Greeff, Umunyamabanga Mukuru wa Sandu, yavuze ko basanze ibi birego bifite ishingiro, ndetse SANDF nayo yabyemeye, isaba ko hakorwa iperereza ryimbitse.

Ni mu gihe ishyaka riri muri Guverinoma y’Ubumwe bw’Igihugu (GNU), kimwe n’ishyaka ritavuga rumwe n’ubutegetsi rya Economic Freedom Fighters (EFF), byombi bikomeje kunenga uburyo abasirikare b’igihugu cyabo boherezwa mu butumwa bwo kugarura amahoro mu bindi bihugu, nyamara bikabagora kubona ibyo bakeneye by’ibanze.

SADC yo ivuga ko igikomeje kuyibanzeho ari ugushyigikira amahoro arambye muri Congo, binyuze mu mbaraga za dipolomasi n’ubufatanye bwa politiki mu karere.

Ibi bibazo byateje impaka ndende mu baturage ba Afurika y’Epfo, bamwe bibaza niba koko kohereza ingabo mu kindi gihugu bifite ireme igihe batabona ibyo kurya cyangwa imishahara, mu gihe ubuyobozi bwa SADC bwemeza ko ibikorwa byose bikorwa mu mucyo no ku gihe.

Nsengimana Donatien |Ijambo.net