Leta ya DRC irashinjwa kurasa mu baturage hakoreshejwe intwaro ziremereye

Ihuriro ryiswe AFC/M23 ryatangaje ko ingabo z’uruhande bahanganye zikomeje ibikorwa byo gukoresha intwaro za rutura mu bice bituwe n’abaturage, harimo n’indege zitagira abapilote zizwi nka kamikaze drones, zikoreshwa mu kurasa mu duce dutuwe n’abasivili.

AFC/M23 ivuga ko uretse izi ntwaro ziremereye, hari n’abarwanyi benshi n’intwaro za rutura byoherejwe mu bice bitandukanye by’Intara ya Kivu y’Amajyaruguru, aho imirwano ikomeje gufata indi ntera.

Ibi birego bije mu gihe imirwano ikomeje gufata indi ntera mu burasirazuba bwa Repubulika Iharanira Demokarasi ya Congo, ikaba imaze gutuma abaturage benshi bava mu byabo, abandi bakinjira mu nkambi z’impunzi mu duce dutandukanye twa Kivu.

AFC/M23 ishinja uruhande bahanganye kuba rukomeje ibikorwa bihungabanya umutekano w’abasivili, rukoresheje intwaro ziremereye zidakwiye gukoreshwa mu bice bituwe n’abaturage, ibintu bavuga ko byabangamira amahame mpuzamahanga agenga intambara.

Ku rundi ruhande, Leta ya Congo isanzwe ishinja umutwe wa M23 kuba ari wo utuma umutekano wifashe nabi mu burasirazuba, ndetse ukomeje kwigarurira uduce twinshi. Ibi byatumye n’abaturage bo mu bice bitandukanye bahangayikishwa n’ubuzima bwabo n’imitungo yabo.

Kugeza ubu, imiryango mpuzamahanga ikomeje gusaba impande zombi gushyira imbere ibiganiro n’amahoro, no kwirinda ibikorwa bihungabanya ubuzima bw’abasivili.