Kanye West yacanye umuriro kuri internet: “Umugore utampa imibonano si inshuti yanjye’’

Umunyamuziki w’Umunyamerika uzwi cyane ku isi, Kanye West, yongeye kuvugisha benshi nyuma y’uko atangaje ibitekerezo bye bikakaye ku mibanire hagati y’abagabo n’abagore, by’umwihariko ku bijyanye n’imibonano mpuzabitsina.

Nk’uko byatangajwe n’urubuga rw’ibyamamare “Hollywood Unlocked”, Kanye West binyuze ku mbuga nkoranyambaga ze yasize ubutumwa buteye impaka aho yagize ati: “Niba umukobwa/umugore atemeye ko turyamana, ubwo si inshuti yanjye.”

Aya magambo ye yatumye benshi bamwibasira, bamwe bamushinja kudaha agaciro icyemezo cy’umugore ku buzima bwe bwite n’umubiri we. Abakoresha imbuga nkoranyambaga batangaje ko amagambo nk’aya asubiza inyuma urugamba rwo kurwanya ihohoterwa rishingiye ku gitsina ndetse no gushishikariza abantu kubaha amahitamo y’abandi, cyane cyane mu bijyanye n’imibonano mpuzabitsina.

Hari n’abandi, ariko, bamushyigikiye bavuga ko ashobora kuba yari ashaka kugaragaza ko ubucuti bwabo bugomba kuba bushingiye ku bwumvikane busesuye, nubwo uburyo yabivuze bwateye urujijo.

Kanye West asanzwe azwiho gutangaza ibitekerezo bikomeye kandi bitavugwaho rumwe, bigatuma akenshi aba mu itangazamakuru kubera imvugo ze zidasanzwe. Iyi si inshuro ya mbere avuze ibintu biteje impaka ku mbuga nkoranyambaga, dore ko no mu bihe bishize yavuze amagambo yakomeje kuvugisha benshi mu bijyanye n’idini, politiki, ndetse n’imibanire n’abandi bahanzi.

Ni inkuru igaragaza uburyo amagambo y’ibyamamare ashobora kugira ingaruka ku muryango mugari, cyane cyane iyo atanzwe mu buryo budasobanutse neza cyangwa budaha agaciro abandi.

Nsengimana Donatien