Uburayi Bwafashe Umwanzuro Ukomeye ku Gisirikare — Ese niki kigiye gukurikiraho?

Mu gihe ibihugu byo mu Burayi byiyemeje kongera ingengo y’imari y’ibikorwa bya gisirikare ku kigero kitigeze kubaho mu mateka y’uyu mugabane, benshi baribaza ingaruka z’uyu mwanzuro ku mibereho myiza y’abaturage ndetse no ku bikorwa byo kurengera ikirere.

Nyuma y’amakuru y’uko ibihugu bigize NATO byemeye kuzamura ingengo y’imari ya gisirikare kugeza kuri 5% by’umusaruro w’ubukungu bwabo (GDP) bitarenze umwaka wa 2035, intego nyamukuru ni ukwiyubaka mu rwego rwo kwirinda no kwitegura ibibazo by’umutekano bishobora kwaduka. Ibi byaje nyuma y’ibibazo by’umutekano ku isi nko mu burasirazuba bw’Uburayi ndetse no mu Burasirazuba bwo hagati.

Uburayi bushaka kwihagararaho no kwigenga mu bijyanye no kurinda ibihugu byabwo, cyane cyane bitewe n’amarangamutima yo kugabanya uruhare rwa Amerika muri NATO.

Ese Ibi Bizatwara Amafaranga Angana Gute?

Uyu mwanzuro wa gisirikare uzajya usaba miliyari y’amayero buri mwaka. Iki gice kinini cy’ingengo y’imari gishobora gutuma habaho kugabanya inkunga ku bindi bikorwa by’ingenzi birimo gahunda zo guteza imbere imibereho myiza y’abaturage nk’ubuvuzi, uburezi, n’ubuhinzi.

Abahanga mu by’ubukungu bagaragaza impungenge ko ibi bishobora no kongera amadeni ya leta ndetse n’ibibazo by’izamuka ry’ibiciro (inflation), cyane cyane mu bihugu bikomeye mu bukungu.

Imibereho Myiza Ishobora Guhungabana?

Imibereho myiza y’abaturage ishobora kugirwaho ingaruka zikomeye n’iyi politiki nshya. Kugabanya inkunga y’imari ku mishinga y’ubuvuzi, uburezi, n’imibereho myiza bishobora gutuma abari mu byiciro byoroheje  bahura n’ubukene bwinshi no kugabanuka kw’iby’ibanze bibafasha mu buzima bwa buri munsi.

Naho Kurengera Ikirere?

Ikindi kibazo gikomeye ni ingaruka z’iyi politiki ku bikorwa byo kurengera ikirere. Ubushakashatsi bwerekana ko izamuka ry’ingengo y’imari ku gisirikare rishobora gutuma habaho kwiyongera kw’imyuka ihumanya ikirere, kugabanuka kw’ishoramari mu ngufu zisubira, ndetse no kwiyongera kw’ibyuka bihumanya bituruka ku nganda za gisirikare.

Ibi bishobora guhungabanya gahunda z’ingenzi zo kurwanya ihindagurika ry’ikirere, bityo bigateza akaga ku bidukikije ndetse no ku buzima bw’abaturage mu gihe kirekire.