Abasivile batatu bishwe n'abantu bitwaje intwaro mu mujyi wa Goma

Mu ijoro ryakeye ryo kuri uyu wa 11 Mata  muri Repubulika Iharanira Demukarasi ya Congo mu mujyi wa Goma humvikanye urufaya rw'amasasu rwaguyemo abasivile batatu bikaba bikekwako ari abo mu mutwe witwaza intwaro w'Aba-Wazalendo basanzwe bakora ibikorwa by'ubugizi bwa nabi muri wo mujyi wa Goma.

Amakuru ava muri uwo mujyi avugako abakekwa batangiye kurasa abo basivile ubwo bari  babaketseho kuba bafite amafaranga.

Polisi yo muri uwo mujyi ikomeza ivugako ubwicanyi mu mu mujyi wa Goma buri kurushaho kwiyongera kuko no mu ijoro ryo ku wa kabiri rishyira ku wa gatatu harashwe abandi basivile batatu nyuma yuko bari binjyiye muri Restaurant gufata icyo kurya.

Abo bantu batatu ubwo baraswaga n'abantu bitwaje intwaro byarangiye nabo bahasize ubuzima.

Polisi yo muri uwo mujyi ntabwo yigeze itangaza ababa bari inyuma y'ubwo bwicanyi ariko yatangajeko ayo makuru yahise ashikirizwa Meya w'umujyi Faustin Kapenda kugirango agire icyo abikoraho.

Ibi biri kuba mu gihe intambara hagati ya M23 n'ingabo za Leta idahagaze kandi M23 ikaba ikomeje kwigarurira bimwe mu bice byo muri Kivu ya Ruguru kandi ingabo za MONUSCO zari zimaze imyaka 21 muri DRC nazo zatangiye kuva muri icyo gihugu.